Таңдаулы ән 1
Әннің атауы
1
Сүлейменнің таңдаулы әні.
Қалыңдықтың алғашқы өтінішін білдіруі
(Қалыңдық:)
Еріндерің өпсін қайта-қайта мені,
Махаббатың сенің шараптан да тәтті,
2
Иісмайыңның жұпары аңқып кетті,
Атың шашылған иіссудай әйгілі,
Сондықтан да қыздар өзіңе тәнті.
3
Ала кетші мені өзіңмен бірге,
Жылдам жүгірейік екеуіміз, кәне!
Патшам мені кіргізді өз бөлмелеріне.
(Қалыңдықтың құрбылары:)
Саған шаттанып өзіңді жырлаймыз,
Махаббатыңды шараптан көп мақтаймыз.
(Қалыңдық:)
Өзіңді ұнатқандарына осылардың,
Уа, жаным, сен әбден лайықтысың!
4
Өңім қара торы, әйтсе де сұлумын,
Уа, қыздары Иерусалим қаласының.
Қидардағы шатырлардай қара торымын,
Сүлейменнің қара перделеріне ұқсаймын.
Қалыңдықтың жасқана толғануы
(Қалыңдық:)
5
Қарамаңдаршы маған тесірейе,
Бетімді күйдірді күн сәулелері.
Ағаларым маған ашуланған еді,
Баққызып қойды содан жүзімдіктерді,
Сөйтіп күте алмадым өз жүзімдігімді.
6
Айтшы маған, уа, сүйіктім, қай жерде
Бағып жүресің өз отарыңды?
Әрі сен қайда барып, түскі кезде
Тынықтырып аласың қойларыңды?
Мен несіне қаңғырамын бет-перде
Жамылған жүгенсіздей, достарыңның
Отарлары арасынан сені іздеуге?
(Құрбылары:)
7
Ең сұлу ару, сен мұны білмеймісің?
Ұсақ малдың соқпақтарымен жүр сонда,
Жайып бақ лақтарыңды өзіңнің
Шопан қостарының маңайында.
Күйеу жігіттің мейірімді мақтау сөзі
8
Жаным, сені ұқсатам сайгүлікке
Жегілген перғауынның күймесіне.
9
Екі бетің көрікті сырғаларыңмен,
Мойның да әп-әдемі алқаларыңмен!
10
Өзіңе арнап күміспен көмкерілген
Алтын сырғалар соқтырып беремін мен.
Қалыңдықтың шаттана толғануы
(Қалыңдық:)
11
Патшам дастарқан басына жайғасты,
Иісмайымның жұпары сол тұста жайылды.
12
Сүйіктім хош иісті мүр шайырындай,
Кеудемде аңқып тұрған қалташықтай,
13
Ен-Геди жүзімдігінің қынагүл шоғындай.
Екі ғашықтың көңілді айтысы
(Күйеу жігіт:)
14
Уа, жаным, керемет қой сұлулығың,
Көгершіндей қос жанарың, сондай сұлусың!
(Қалыңдық:)
15
Қандай көріктісің, сүйгенім, сүйкімдісің!
Көк шалғын болады төсегіміз біздің.
(Күйеу жігіт:)
16
Самырсын бұтақтары шаңырағымыздай,
Жұпар шыршалар уықтарымыздай.