Аян  2

Ефестегі қауымға арналған сәлемхат

«Ефестегі қауымның періштесіне былай деп жаз:

Бұл — оң қолында жеті жұлдыз ұстап, жеті шам қойғыштың арасында жүретін Иеңнен хабар.

Мен сенің істеріңді білемін: сен еңбек етіп, шыдамды болып келесің. Арам адамдарға төзе алмай, өздеріне Құдайдың елшілері деген атақты таңатындарды сынап, өтірікшілер екенін анықтадың. Менің атыма бола (еңбектеніп) көп ауыртпалықты басыңнан өткізгенде шыдамдылық көрсетіп, қажымадың.

Алайда саған айтар наразылығым мынау: сен алғашқы сенген кездегі сүйіспеншілігіңді жоғалтып алдың. Өзіңнің қандай биіктіктен құлдырағаныңды ойлашы! Өкініп, теріс жолыңнан қайтып, алғашқыдағы игі істеріңді жасайтын бол! Әйтпесе саған жуырда келемін де, шам қойғышыңды (қауымдардың арасындағы) орнынан алып тастаймын. Егер өкініп, теріс жолыңнан қайтпасаң, осылай істеймін. Бірақ сендегі бір жақсылық мынау: Мен жек көретін николаиттардың істерін сен де жек көресің.

Құлағы барлар Киелі Рухтың қауымдарға айтқандарын жақсылап тыңдап алсын! Жеңіп шыққан әркімге Мен Құдайдың пейіш бағында өсетін, мәңгілік өмірді сыйлайтын ағаштың жемісінен жегіземін.

Ізмірдегі қауымға арналған сәлемхат

Ізмірдегі қауымның періштесіне былай деп жаз:

Бұл — бір кезде өлген, ал қазір тірі «Алғашқы және Соңғыдан» хабар.

Мен сенің (істерің мен) шеккен азаптарыңды әрі жұтаң күйіңді білемін. Ал шынында сен рухани байсың! «Яһудиміз» (яғни Құдайдың халқымыз) дейтіндердің сен туралы айтқан ғайбат сөздерін де білемін. Шын мәнісінде олар «шайтанның мәжілісханасы». Болашақта басыңнан кешетіндеріңнен қорықпа! Рас, шайтан кейбіреулеріңді түрмеге салып, сынамақ, ал көретін азаптарың он күнге ғана созылады. Өлімге дейін Маған адал бол, сонда саған «мәңгілік өмір тәжін» сыйлаймын. Құлағы барлар Киелі Рухтың қауымдарға айтқандарын жақсылап тыңдап алсын! Жеңіп шыққан әркім «екінші өлімнен» зиян көрмейді.

Перғамдағы қауымға арналған сәлемхат

Перғамдағы қауымның періштесіне былай деп жаз:

Бұл — екі жүзі де өткір семсері Бардан хабар.

Мен сенің (істеріңді және) «шайтанның тағы» орналасқан жерде тұратыныңды білемін. Бірақ Менің атымды ұстанып келесің. Адал хабаршым Антипас сенің қасыңда, яғни әзәзіл шайтанның тұрағында, өлтіріліп шейіт болған кезде де Маған деген сеніміңнен бас тартпадың.

Алайда саған айтар біраз наразылығым мынау: араларыңда Балағамның ілімін ұстанушылар бар. Сол көріпкел ежелде Исраилге қарсы шыққан Балаққа халықты күнәға азғыруды үйреткен: оларға жалған тәңірлерге шалынған құрбандықтардың етін жегізді әрі азғындық жасатты. Сондай-ақ, араларыңда николаиттардың (Мен жек көретін) ілімін ұстанушылар да бар. Енді өкініп, теріс жолдан қайтыңдар! Әйтпесе саған жуырда келемін де, сол қате ілімді ұстанушылармен аузымдағы семсеріммен соғысамын.

Құлағы барлар Киелі Рухтың қауымдарға айтқандарын жақсылап тыңдап алсын! Жеңіп шыққан әркімді Мен «жасырылған маннамен» тамақтандырамын. Оған алған кісіден басқа ешкім де білмейтін жаңа есім ойып жазылған бір ақ тасты да сыйлаймын.

Тиятирдағы қауымға арналған сәлемхат

Тиятирдағы қауымның періштесіне былай деп жаз:

Бұл — Құдайдың рухани Ұлынан хабар. Оның көздері оттай жалындап, аяқтары балқыған қоладай жалтырайды.

Мен сенің не істегеніңді — сүйіспеншілігің мен сеніміңді, қызметің мен төзіміңді білемін. Қазіргі игі істерің алғашқыдағыдан көбірек. Алайда саған айтар наразылығым мынау: өзін пайғамбармын деп атайтын Езабел іспетті әйелге жол бересің. Ол Менің қызметшілерімді азғындық жасап, жалған тәңірлерге арналған құрбандықтардың етін жеуге үйретіп адастыруда. Мен сол Езабелге өкініп, азғындық жолынан қайтуға уақыт бердім, алайда ол қайтқысы келмейді.

Біліп ал: Мен Езабелді ауруға шалдықтырып, төсек тартқызамын. Егер сол әйелмен бірге азғындық жасап келгендер оның жаман істерінен қайтпаса, оларға да қатты азап шеккіземін. Оның соңынан ергендерді өлтіріп құртамын. Сонда Менің әркімнің жүрегінің түкпір-түкпірін тексеретін Біреу екеніме барлық қауымдардың көздері жететін болады. Мен әрқайсыңның істеріңе қарай еселеріңді қайтаратын боламын.

Ал Тиятирда Маған адал болып қалғандарға, яғни осы арам ілімді қабылдамай, «шайтанның терең құпиялары» деп аталғанды үйренбегендерге, былай деймін: сендерге тағы басқа ауыртпалық түсірмеймін; алайда Мен келгенше, өздеріңде бар рухани игіліктерді берік ұстаңдар! Істерімді аяғына дейін атқарып, жеңіп шыққандарға халықтардың үстінен билік жүргізу құқығын сыйлаймын. Оларға қатаң билік жүргізеді. Қыш ыдыстарын лақтырып сындырғандай, қиқарлықтарын тас-талқан етеді. Мен де Әкемнен осындай билікті алғанмын.

Мен жеңіп шыққандарға таңғы жұлдызды да сыйлаймын. Құлағы барлар Киелі Рухтың қауымдарға айтқандарын жақсылап тыңдап алсын!

а  1:11; Елш 18:19; 19:1; Ефестіктерге арналған хат туралы мәліметті де қараңыз.

ә  Немесе: Ефестегі қауымның хабаршысына; яки: Ефестегі қауымға — Құдайдың хабаршысына. (Бұл түсініктеме осыдан кейін берілген алты сәлемхатқа да қатысты: 2:8,12,18; 3:1,7,14.)

б  Мат 24:12; Ерм 2:2.

в  (1:20) Яки: шырағданыңды.

г  Николаиттар: жалған ілімдерді қауымдарға енгізіп, Құдайдың шынайы ілімімен араластырушылар (2:14-15,20).

ғ  Яки: Маған сеніп, әзәзіл шайтанның күштерін жеңіп шыққандарға жұмақтағы мәңгілік өмірді сыйлаймын (Жар 2:9; 3:22).

д  (1:11) Яки: Смүрнадағы. (Рим патшасына табынушылық және яһуди діндарларының Мәсіхке сенушілерге қарсы әрекеттері осы қалада ерекше күшті еді.)

е  (3:9) Яки: әзәзіл шайтанға берілген діншілдер тобы. (Мәжілісханаларда яһудилер діни жиналыстарын өткізетін: Мат 12:9.)

ж  Яғни тіпті Маған бола өлуге мәжбүр болсаң да.

з  (3:11; Мат 10:22; Қор1 9:25) Мұндағы «тәж»: лавр жапырағынан өрілген шеңбер (шір) жарыс жеңімпазының басына жүлде ретінде кигізілетін. Осындағы астарлы мағынасы: мәңгілік өмір (3:11; 14:14).

и  Яғни тозаққа түспейді (21:8).

к  (1:11) Бүгінде Бергама деп аталатын қала атының мағынасы «қорған».

қ  Яғни Соттаушы Мәсіхтен (1:16; 2:16; Евр 4:12-13).

л  Перғам халықтың Рим патшасына табынуының Азия аймағындағы ресми орталығы еді.

м  Яки: оларды жыныстық азғындыққа салды. (Бұл оқиға Мұса пайғамбардың Исраил халқын айдаладан Қанахан жеріне бастап алып барған заманында болды: Рул 25:1-4; 31:16.)

н  2:6.

о  Яғни оларға үкім шығарамын (1:16; 2:12).

ө  Құдай ежелде айдалада көшіп-қонып жүрген Исраил халқына аспаннан манна деген тәтті нан жаудырғандай, қазір Өзімен тығыз байланыста жүргендерге рухани нәр сыйлай береді (Жох 6:48-58).

п  Ақ тас: сол заманда жарыс жеңімпазына әр түрлі артықшылықтары үшін берілетін жүлде не сый-сияпат.

р  (1:11) Бүгінде Ақ-хизар деп аталатын Тиятир қымбат мата өндірісінің және оны сатудың орталығы болды. (Лүдия осы қаладан шыққан саудагер әйел еді: Елш 16:14.)

с  Б.з.д. 874-853 жж. Исраилге патшалық құрған Ахабтың зұлым әйелі Езабелдің халықты жалған тәңірлерге табындырғаны (Пат1 16:31-33; 19:1-2; 21:25-26) іспетті; сол заманда қауымдағы бір беделді әйел де сенушілерді Құдайға ұнамсыз дәстүрлерді қабылдап, ұстануға азғырып жүрген болса керек.

т  Немесе: Оның балаларын; яғни оның жалған ілімі мен дәстүрлерін ұстанушыларды.

у  Немесе: әркімнің бүйрегі мен жүрегін.

ұ  (12:5; 19:15) Немесе: Оларды темір асатаяқпен бағады.

ү  Жыр 2:9; Иш 20:14.

ф  Яғни олар көкте ерекше салтанатты иемденетін болады (Дан 12:3).