Қорынттықт. 2-хат  11
Пауыл мен жалған елшілер арасындағы айырмашылықтар
1
Мақтануыммен біраз ақымақ болып көрінгеніме төзсеңдер екен деймін.
а
Іс жүзінде төзіп келесіңдер де.
2
Сендерді Құдай берген қамқорлықпен қызғыштай қорғап келемін. Өздеріңді бір-ақ «Күйеу» — Мәсіхке «айттырып қойдым», әрі пәк таза «қыз күйлеріңде» ұзатқым келеді.
ә
3
Әзәзіл жыланның қулықпен Хауа ананы алдап, азғырғанындай,
б
кейбіреулер сендердің де ой-саналарыңды Мәсіхке деген адалдық пен пәк берілгендіктеріңнен ауытқытып жүрмесін деп уайымдаймын.
4
Себебі, біреулер сендерге келіп, біз уағыздағаннан өзге «Исаны» уағыздағанда,
в
немесе өздерің қабылдаған Киелі Рухтан өзге рухты, яки қабыл алған Ізгі хабардан басқа біреуін насихаттағанда, сендер бұның бәріне оңайлықпен көне кетесіңдер.
5
Алайда өзімді сол бір «озат елшілерден» кеммін деп ойламаймын.
6
Тіптен сөзге шешен болмасам да, білімім жеткілікті. Соған барлық жағынан да көздеріңді толық жеткіздік қой.
7
Сендерді рухани жағынан көтермелеу үшін өзімді «төмендетуіммен» күнә жасадым ба? Құдайдың Ізгі хабарын сендерге тегін уағыздадым емес пе!
8
Өздеріңе қызмет ету үшін басқа қауымдардың көмегін қабылдап, оларды тонағандай болдым. Қастарыңда жүрген кезімде мұқтаждық көрген күнде де ешқайсыңды әуреге салмадым.
9
Өйткені Македониядан келген бауырластар қажет нәрселерімнің орнын толтырды. Қай істе де сендерге ауыртпалық түсірмеуге тырыстым және тырысамын да.
10
Өз бойымдағы Мәсіхтің адалдығымен мәлімдеймін: Ахая аймағындағы ешкім осы мақтануымды тоқтата алмайды!
11
Неге бұлай істеймін? Сендерді сүймегендіктен бе? Өздеріңді сүйетінім Құдайға аян! Қалай істеп келсем, солай істеуді жалғастырмақпын.
12
Жасаған игіліктеріне мақтанып, бізбен бірдей көріну үшін сылтау іздейтіндерге жол беретін ойым жоқ.
13
Ондайлар — жалған елшілер, алдамшы қызметкерлер, өңдерін айналдырып, Мәсіхтің елшілері болып көрінгендер.
г
14
Мұнда таңғалатын ештеңе жоқ: шайтанның өзі өңін айналдырып, нұрлы періште болып көрінеді.
ғ
15
Сондықтан оның қызметшілерінің де өңдерін айналдырып, әділдіктің қызметшілері болып көрінуі ғажап іс емес. Олардың ақыры қылықтарына сай болмақ!
Елшінің басынан өткен азаптарын баяндауға мәжбүр болуы
16
Тағы да қайталаймын: ешқайсыларың мені ақымақ деп ойламаңдар! Ал егер олай ойласаңдар, мені ақымақ ретінде қабылдаңдар, сонда (Ізгі хабарды бұрмалап таратушы солар сияқты) мен де аздап мақтана аламын.
17
Ендеше батыл мақтанғанда, Иеміздің үлгісі бойынша емес, ақылсыз болғансып айтатын боламын.
18
Талай жалған тәлім берушілердің өзімшіл ниетпен (сендердің жетістіктеріңе) мақтанып жүргені іспетті, (өздеріңе жіберген елші болуымды қорғау үшін) мен де мақтанбақпын.
19
Себебі «сондай дана» сендер ақымақтарға қуана төзесіңдер-ау!
д
20
Расында біреу өздеріңді құл қылса да, ақыларыңды жеп, тонап кетіп, менсінбей өктемдік көрсетсе де, беттеріңді соқса да, бәрібір төзесіңдер!
21
Осындай қылықтарды өздеріңе істеуге біздің «күшіміз жетпеді».
е
Мұны айтқанда алдарыңда ұятқа қаламын ба?
Ал егер солардың біреуінің бір нәрсеге мақтануға дәті болса — ақымақша айтайын — соған мақтануға менің де дәтім барады.
22
Олар яһуди ме? Мен де яһудимін. Олар исраилдіктер ме? Мен де солаймын. Олар Ыбырайым атаның ұрпағынан ба? Мен де.
ж
23
Олар Мәсіхтің қызметшілері ме? Ақымақ кісідей сөйлеп тұрмын:
з
мен Мәсіхке солардан бетер қызмет етудемін. Оларға қарағанда әлдеқайда көбірек еңбектеніп, түрмеге қамалып, аяусыз соғылдым, талай рет өліммен бетпе-бет келдім.
24
Яһудилер мені бес рет отыз тоғыздан қамшымен соқты.
и
25
Мені үш рет таяқпен дүре соқты, бір рет өлтірмек болып таспен атқылады. Үш рет кеме апатына ұшырадым, бір тәулік бойы ашық теңізде қалқып жүріп, әрең аман қалдым.
26
Көп рет саяхатқа шығып, тасыған өзендерден, қарақшылардан, өз ұлттастарым мен басқа ұлттық адамдар тарапынан сансыз қауіп-қатерге ұшырап келемін. Қала мен иен далада, теңізде және жалған бауырластар арасында қатерге тап болдым.
27
Ешқандай аянбастан еңбектеніп келемін, ұйықтамаған түндерімнің есебі жоқ. Аштықтың, шөлдің не екенін білемін, киімге мұқтаж болып талай рет тоңдым.
28
Басқа жайттар туралы айтпағанның өзінде күн сайын барлық қауымдардың қамдары еңсемді басып, толғандырады.
к
29
Біреу әлсіз болса, мен де өзімді әлсіз сезінбеймін бе? Біреу күнәға азғырылса, сол үшін күйіп-жанбаймын ба?
30
Егер де мақтануға тиіс болсам, өзімнің күшсіз екенімді көрсететін жайттармен мақтанайын.
31
Иеміз Исаның Әкесі, мәңгілік мадаққа лайық Құдай, мына айтатындарымның нағыз шындық екенін біледі:
32
Дамаскіде болған кезімде Аретас патшаның
қ
аймақ әміршісі қала қақпаларын күзеттіріп, мені тұтқындауға бұйырды. Бірақ мен қаланы қоршаған қамалдағы терезеден үлкен себетпен төмен түсіріліп, оның қолынан сытылып кеттім.
л

а  5:13; 11:16-17,19-21.

ә  Кейде қауым «қалыңдық», ал Мәсіх «Күйеу» ретінде суреттелген (Қор1 6:15; Еф 5:23-32; Аян 19:7-9). Пауыл қорынттық қауымның «рухани әкесі» болғандықтан, оның қате ілімдермен бүлініп арамданғанына төзе алмады.

б  Жар 3:1; Аян 12:9; 20:2.

в  Яки: біз уағыздаған Мәсіх Иса туралы шынайы ілімді бұрмалап таратқанда (Қор1 1:3; Ғал 1:6-9).

г  Яки: алдамшы жұмысшылар, Мәсіхтің елшілерінің сырт көрінісін жамылғандар! (Мат 7:15)

ғ  Яки: Құдайдың нұрлы хабаршысының сырт көрінісін жамылған (Мат 4:10; Ғал 1:6-9).

д  Яғни жалған елшілердің ақымақ ілімдеріне қуанышпен төзулерің ешбір даналыққа сыймайды!

е  Яғни осындайды өздеріңе істеу біз үшін ұят болар еді (1:23-24; Сал1 2:3-10).

ж  Құдай ежелде Ыбырайыммен, кейін Исраил халқымен Келісімдер жасаған болатын. Сол халықтың бір бөлігі — яһудилер бұл жайтты зор мақтан тұтатын (Жар 12:1-3; 15:5-21; Мыс 34:27-28).

з  Пауыл елші өзінің өкілеттілігін қорғау үшін ақылсыздың сөйлегені іспетті дәлелдерді келтіруге мәжбүр болды (11:1,16; 12:1,21).

и  Немесе: қырыққа біреуі жетпей дүре соқты. (Бұл яһудилердің жазалау дәстүріне сай болатын: Заң 25:2-3; Елш 5:39).

к  Елш 15:36,40-41; 20:18-21,28-31; Қол 2:1.

қ  Ирод Антипастың қайын атасы Аретас ІV Набатея өлкесіндегі арабтарға б.з.д. 9 ж-дан б.з. 40 ж. аралығында патшалық құрды. Сол кезде оның билігі Дамаск қаласына да жүрді.

л  (Елш 9:24) Беделді дінбасы болған Пауыл үшін бұл жайт, әрине, намыстанарлық еді.