Салониқал. 1-хат  1
Арнау және сәлем
1
Құдай Әкеге және Иеміз Иса Мәсіхке сенушілердің Салониқадағы қауымына Пауыл, Сыйлас
а
және Тімотеден дұғай сәлем. Құдай сендерге рақымын жаудырып, тыныштығын сыйлай көрсін!
Сенушілердің үлгілі сеніміне ризашылық білдіру
2
Сендерді Құдайға сиынғанда еске алып, бәрің үшін әрдайым шүкірлік айтамыз.
3
Құдай Әкеміздің алдында сендердің Оған деген сеніммен игілікті іс істеп, сүйіспеншілікпен ауыр еңбек етіп және Иеміз Иса Мәсіхке
ә
табандылықпен үміт артып жүргендеріңді үнемі еске алып отырамыз.
4
Құдай сүйген қымбатты бауырластар, Оның сендерді таңдап алғанын білеміз.
5
Себебі біз сендерге Ізгі хабарды сөзбен ғана емес, құдіретпен, Киелі Рухпен және зор сеніммен де жеткіздік. Сендердің игіліктерің үшін араларыңда қалай әрекет еткенімізді өздерің білесіңдер.
6
Ал сендер бізге және Иемізге еліктеп көп азапқа ұшырасаңдар да, Ізгі хабарды Киелі Рух сыйлаған қуанышпен қабылдадыңдар.
7
Осылай Македония мен Ахая өлкелеріндегі
б
сенушілердің барлығына үлгі болдыңдар.
8
Иеміздің хабары сендерден Македония мен Ахаяға ғана тараған жоқ, Құдайға деген сенімдерің барлық жерде белгілі болғандықтан, бізге бұл туралы айтудың қажеті де жоқ.
9
Себебі жұрт сендердің бізді қандай жылылықпен қабылдағандарың және жалған тәңірлерден бас тартып, Құдайға бет бұрғандарың туралы бір-біріне айнала әңгімелеп жатыр. Енді сендер тірі де шынайы Құдайға қызмет ете жүріп,
10
Оның рухани Ұлы Исаның көктен түсуін күтудесіңдер. Құдай өлімнен қайта тірілткен Иса бізді келешектегі қаһарлы соттан құтқарып алады.
в

а  Түпнұсқада Сыйлас есімінің толық түрі Силуанос қолданылған (Елш 15:22,40; 17:14-15; 18:5; Сал1 2:1).

ә  Мысалы, Мәсіхтің қазір беріп жатқан игіліктеріне және болашақтағы қайта оралуына.

б  Македония, Ахая (Ахейя): Грекияның солтүстігі мен оңтүстігіндегі өлкелер.

в  5:8-10; Жох 3:16-21; Рим 5:9-11.