Малахи пайғамбардың есімі «Менің хабаршым» дегенді білдіреді. Ол парсы патшасы Артақсерікс І-нің уәзірі Нехемияның замандасы болды (Нех 2:1). Б.з.д. 445 ж. Нехемия Яһуда аймағының әкімі болып тағайындалып, Иерусалимнің қирап қалған қамал қабырғаларын қайта тұрғызу үшін сол қалаға барды. Ол, сондай-ақ, халықты жаман әдеттерінен арылып, Жаратқан Иенің өсиеттеріне бағынуға шақырды. Нехемия он екі жылдан кейін парсы патшасының сарайына қайтып кеткенде, Яһуда халқы қайтадан күнәға батты. Олар Жаратқан Иеге мойынсұнбай, Оның ережелері мен өсиеттерін бұзды. Тіпті діни қызметкерлердің өздері азғындыққа түскен еді (Нех 13:7-21).

Осындай қиын заманда Малахи пайғамбар халықтың күнәларын әшкерелеп, оларды тәубеге келуге шақырды. Халық паң да қыңыр сұрақтар қойғанда, пайғамбар оларға Жаратқан Иенің берген жауаптарын жеткізді. Жаратқан Ие олардың жөнсіз іс-әрекеттері туралы Өзінің ойландыратын сауалдарын қойды. Тек Алла Тағалаға қайта оралса ғана, ел қайтадан жарылқанатын болды.

«Жаратқан Иенің ұлы да қорқынышты соты күні» таяп келе жатыр. Халқын сол күнге дайындау үшін Құдай Ие Ілияс пайғамбар іспетті біреуді жіберетін болады. Ілияс пайғамбар кезінде Исраил халқын қайтадан Жаратқан Иенің Келісіміне адал болуға шақырғандай (Пат1 18:20-40), болашақта келетін сол пайғамбар да халықты теріс жолдан қайтуға шақыратын болады (Лұқ 1:17; Мат 11:14).