Жүніс пайғамбар Солтүстік Исраил патшалығындағы Ғат-Хефер қаласында дүниеге келген. Пайғамбар Құдайдың атынан Еробоғам ІІ патшаның (б.з.д. 793-755 жж.) сириялықтарды жеңіп, олардың басып алған жерлерін қайтарып алатыны туралы алдын ала хабарлады (Пат4 14:25). Осы уәде жүзеге асты, бірақ соны көрген Исраил халқы менменсіп кетті. Олардың бойында Құдай тек бізді ғана сүйіп, басқа халықтарды жазалайды деген наным берік қалыптасқан еді.

Кейін Жаратқан Ие Жүніс пайғамбарға Ассур патшалығының астанасы Ниневидің халқын бастарына төнген пәледен сақтандырып, теріс жолдан қайтуға шақыру жайлы жаңа тапсырма береді. Алайда Жүніс елдестері сияқты әрекет етеді: ол туған халқының қас жауын тәубеге келуге шақырудан бас тартады. Жүніс Құдай дұшпандарын кешіріп, жазаламайды, осылай өз халқы Исраил Жаратқан Иенің алдындағы ерекше орнынан айырылады деп уайымдайды (4:2).

Содан Жүніс бір алыс жерге қашып кетуге ұйғарады. Алайда Алла Тағаланың назарынан тыс кету мүмкін еместігіне оның көзі тез жетеді. Жаратқан Ие сұрапыл дауыл жіберіп, сапарды болдырмайды, бірақ керемет іс арқылы пайғамбардың өмірін аман сақтап қалады. Кейін Ол пайғамбарды жаудың астанасы Ниневиге қайтадан жібереді. Бұл жолы Жүніс тапсырылған хабарды жеткізеді.

Ниневидің бүкіл халқы теріс жолдарынан қайтқандықтан Алла Тағала оларды кешіреді. Бұған қатты ренжіген Жүніске Тәңір Ие Өзінің басқа ұлттардың да қамын ойлайтынын, бәрін де құтқарғысы келетінін білдіреді. Содан осы жазба Құдайдың халқына Оның барлық халықтарға деген мейірімділігі туралы маңызды тәлім береді.