Бұл жазбада Құдайдың таңдаулы халқының Бабылға жер аударылғанынан кейінгі тарихы баяндалады. Б.з.д. 538 ж. Жаратқан Ие парсы патшасы Кирдің жүрегіне исраилдіктерге Бабылдан өз елдеріне қайтып, Иерусалимдегі киелі үйді қайта салуға рұқсат беретін жарлықты шығаруға түрткі салды. Бірнеше мың исраилдіктер осы жарлыққа сәйкес елдеріне оралуға дайындалды. Кир патша оларға киелі үйден тоналып, Бабылға әкетілген қымбат бұйымдарды қайтарып бергізді.

Отандарына жеткен халық біраздан кейін аймақ әміршісі Зоробабел мен діни қызметкер Ешуаның басшылығымен киелі үйді қайта сала бастады. Алайда бұларын көре алмаған басқа ұлт басшылары парсы патшасына оларды жамандаған хат жазды. Нәтижесінде құрылыс он жылға тоқтап қалды. Алайда талқандалғаннан жетпіс жыл өткеннен кейін, яғни б.з.д. 516 ж., қайта салынған киелі үй Жаратқан Иеге бағышталды.

Содан елу сегіз жыл өткенде Ұзайыр пайғамбар деп те аталған діни қызметкер Езра яһудилердің тағы бір үлкен тобын ертіп Иерусалимге көшіп келді. Бұл жазбада елдеріне қайта оралған осы отбасылардың және олар әкелген арнайы қымбат бұйымдардың тізімдері берілген. Соларды жау кезінде Иерусалимдегі киелі үйден олжалап алған болатын, ал енді парсы патшасы кері қайтарып берді.

Кейін Езра Құдай халқының елге қайта оралғандардың көбінің Таурат заңындағы ережелерді бұзғандары жайлы хабар алды. Қатты күйзеліп, қайғырған Езра күнәға батқан оларды үлкен жиында әшкерелеп, сол қате іс-әрекеттерінен бас тартуға шақырды. Езра олардың ата-мекендеріне қайтуына Құдайдың зор рақымдылықпен мүмкіндік бергенін естеріне салды. Ал егер күнә жасауларын жалғастыра берсе, Жаратқан Ие оларды жарылқауын доғаратынын ескертті. Керісінше, Құдай осы буынды да жазалап, Бабылға жер аударылған ата-бабаларына істегеніндей уәделі елден қуып шығатын болады! Халық Езраның ескертуіне мойынсұнып, жасаған күнәларынан бас тартты, әрі Жаратқан Иемен араларындағы Келісімді қайтадан бекітті.